Sunntig, 7. Juli 2015, 6:30 Uhr
Me cha Gottes Güeti ir Natur gseh. D’Sunne isch grad ufgange. I hocke ufemne Granitblock am Ufer vom Crescent Lake u gniesse die erschte Sunnestrahle. E Schwarm Änte flatteret drvo u flügt as änere Ufer. Näbuschwade stige usem See uf u schwäbe lutlos drvo. Me ghört Vögu, mindestens zäh verschideni Arte.
Vor mir blüeie blaui Blueme im Sumpf. I weiss nid weli Art dass es isch… aber i ha es Foto gmacht, filicht findis de daheime use. Es schmöckt nach morschem Houz u nach Rouch vom Lagerfüür geschter, wo immer no i mim Fasi hanget. Dr Mond steit no am Himu, geit süüferli unger. D’Wäut erwachet.
Geschter si mr z’viert losglüffe: Dr Trey, d’Krystal, dr Fayzan u ig. Mir si vo Wawona us de Chilnualna Falls entgäge. Das isch e Wanderig, wo sech über knapp füf Meile u zwöitusig Höhefuess dr Bärg düruf zieht, bis zu de Chilnualna Wasserfäu. Dobe hei mr üses Zmittag teilt. När (es isch vieri gsi) hei mr üsi Gruppe trennt. D’Krystal u dr Fayzan hei e Tagesusflug planet gha, u si drum wieder hei zue.
Ds Wätter isch guet gsi. Es het chli grägnet so ab de haubi vieri, aber s’isch lang nid eso schlimm gsi wie die Gwitter im Wätterbricht. D’Krystal wär no fasch ohni Schlafsack mit cho übernachte, we nid dr Fayzan gfunde hät, heiga wär doch gschider. Si hätt ziemlech gfrore :) aber es isch definitiv wunderschön hie.
Dr Trey und ig si zügig wyter; mir hei no siebe Meile bis zum Grouse Lake wöue loufe. Gägen Abe hei mr wieder blaue Himu gseh, u es het je länger je meh ufta. Grouse Lake hei mr verpasst… drfür si mr bis Crescent Lake cho.
Üse Lagerplatz isch chli oberhaub vom See, zwüsche Granitblöck u Föhre. I dene Föhre hei mr am Trey sini beide Hängematte ufghänkt. När hei mr binere Fürsteu ganz ir Nechi mit trochenen Äst u am Trey siner säubergmachte Füüraazünder es chlises Lagerfüür gmacht. Mir hei nid viu gredt a däm Abe. Eifach ds Füür gnosse, Znacht gässe, d’Stärne aagluegt, u si de gli mau müed u zfriede i Schlafsack und Hängematte gchraxlet.
Itz isch Morge vomene nöie Tag, es nöis Aabetür faht a…
