Sunntig, 21. Juli 2015, 7:00 Uhr
Es isch Morge am 7ni. D’Sunne isch ufgange nachere wunderbare Nacht, u het mi usem Schlafsack gchutzelet. I bi im Yosemite National Park, ufemne felsige Hügu ir Nechi vom Canyon Creek. Me ghört dr Bach ruusche, d’Spächte i de Böim, u e huufe angeri Vögu u Insekte.
Scho lang nüm han i d’Stärne so schön gseh. I bi ir Biwakhüue übernachtet, über mir e stärneklare Himu. Bim Iischlafe het me dr gross Wage gseh, dr chlin Wage mitem Drache, Herkules u Corona u Bootes u wie si aui heisse. Es bitzeli später isch ds Summerdrüeck ufgange, u dr Skorpion het me gseh mitem Saturn grad näbedran. Mitz ir Nacht bin i no einisch erwachet. Denn isch ds Summerdrüeck zmizt am Himu gsi, u d’Miuchstrass het sech drdür zoge… wow!
Mir si z’viert ungerwägs, e Gruppe Studente vor EPFL, wo aui bi Google es Praktikum mache. D’Viufaut isch super: je öpper us Russland, Polen, Österrich u dr Schwiiz. Die Jungs hei tiptop möge, i bi meischtens dr langsamst gsi. Ds Teamwork het mi beiidruckt: mir hei ei Rucksack gha, wo ziemlech gross u schwär isch gsi wägem Bärkanischter mitem Proviant. Wo mr das hei gmerkt, hei sech aui churzerhand abgwächslet mit Trage.
Trotzdem isches aasträngend gsi: Mir hei e Route gwählt gha, wo üs vo Mirror Lake (im Tal uf 4000 Fuess) bis zum Snow Creek uf 7000 Fuess ueche füehrt. Es isch im Zickzack dr Bärg z’düruf. Dr Ufstig isch nur zwöi Kilometer wyt gsi, aber die hei nis guet drü Stund Zyt brucht u zwöi Liter Wasser pro Person.
Doch wie gseit, die Lüt si fit. Ersch am Abe hei mr gmerkt, dass es äuä doch chli viu isch gsi. Mir si gli mau ga lige, zum Teil mit Chopfweh vor Aasträngig u vor Sunne.
Itz isch Morge nachere ruehige u erholsame Nacht. I fröie mi ufs Zmorge. Es söu warme Tee gä, Nesquick, Brot mit Striichchäs u Nutella u Ärdnussbutter… Üses Ässe isch emu aues no da. Anschiinend het sech ke Bär für üse Kanischter interessiert. O d’Hirsche wo mr geschter gseh hei schine sech en angere Schlafplatz gsuecht z’ha.
Auso… Füür mache fürs Zmorge!
